SALAMAT EXCELLENCE AWARD FOR LEADERSHIP

iMINDSPH

Sumalang na sa first reading ng BTA parliament ang BTA Bill No. 355. Ito ang Salamat Excellence Award for Leadership o SEAL act of 2025 na inihain ni Member of Parliament Atty. Naguib Sinarimbo.

Ang proposed measure ay naglalayon na i-institutionalize ang SEAL bilang pinakamataas na pagkilala ng pamumuno sa BARMM.

Sa ilalim ng panukalang batas, ang mga qualified Local Chief Executives na mangunguna sa top three-stage assessment process ay tatanggap ng SEAL gold medallion at P20 million development grant para sa kanilang local government unit.

Binigyang diin ni MP Sinarimbo na may mahigpit na panuntunan na susundin sa paggamit ng grant upang matiyak na ito ay gagamitin lamang para sa local development projects.

Ayon sa principal author ng proposed legislation, ang pondo ay hindi maaring gamitin para sa administrative o personal expenses.

Kinikilala ng SEAL program ang outstanding LCEs na nagpapakita ng kakayahan at pagsunod sa accountable leadership, participatory leadership, at service-oriented leadership.

Kinakailangan din na pasok sa eligibility criteria ang nominado kabilang dito ang good moral standing, walang pending o prior administrative o criminal cases, at hindi pa nakatanggap ng SEAL award.

Nakasaad din sa proposed bill ang tatlong bahagi ng evaluation na kinabibilangan ng documentary review, on-site validation, at final assessment ng high-level selection committee.

Upang magtutuloy-tuloy ang programa, iminumungkahi rin ng panukalang batas ang pagtatag ng SEAL Endowment Fund na may initial allocation na P250 million, na pangangasiwaan ng Bangsamoro Treasury Office.

Minamandato rin ng panukala ang pakikilahok ng academic institutions, partikular ang Mindanao State University (MSU) System, sa validation at documentation ng leadership practices ng mga awardee.

Unang inilunsad ni MP Sinarimbo ang SEAL program sa kasagsagan ng kanyang panunungkulan bilang MILG minister.

Co-authors ng BTA Bill No. 355 sina MPs Abdullah Hashim, Romeo Sema, Rashdi Adiong, Alirakim Munder, Amer Zaakaria Rakim, Tomanda Antok, Kitem Kadatuan Jr., Ma-arouph Candao, Abdulbasit Benito, Alindato Pagayao, Ibrahim Ibay, Butch Malang, at Muhammad Nadzir Ebil.