Kahalagahan ng Early Warning at Early Response (EWER) binigyang-diin ng Bangsamoro READi sa isinagawang training hinggil sa Disaster Risk Reduction ng MSSD.

iMINDSPH

Sa layuning palakasin ang kakayahan ng mga lokal na responder at stakeholder sa maagang pagtukoy ng panganib at maagap na pagkilos upang mabawasan ang pinsala sa buhay at ari-arian, isinagawa ng Ministry of Social Services and Development–Maguindanao del Sur ang Disaster Risk Reduction training noong Miyerkules, December 17, sa Cotabato City.

Dito, binigyang-diin ng Bangsamoro Rapid Emergency Action on Disaster Incidents (READi) ang mahalagang papel ng Early Warning at Early Response (EWER) mechanisms sa epektibong pagtugon sa mga sakuna at human-induced incidents.

Nagbigay ng technical assistance ang Bangsamoro READi, na tumalakay sa kahalagahan ng pag-uugnay ng early warning systems sa organisado at koordinadong response measures.

Ayon sa READi, ang napapanahong abiso, kapag sinabayan ng agarang aksyon, ay kritikal sa pag-iwas sa mas malubhang epekto ng mga sakuna.

Ipinaliwanag sa pagsasanay na ang EWER mechanisms ay nagbibigay-daan sa mga awtoridad at responder na makapagtukoy at makamonitor ng mga banta, at makapaghatid ng impormasyon sa mga komunidad sa tamang oras. Samantala, tinitiyak ng Early Response na kapag nailabas na ang babala, ang evacuation, deployment ng resources, at mobilisasyon ng response teams ay naisasagawa nang mabilis at maayos, na may pagbibigay-prayoridad sa mga vulnerable sector sa pamamagitan ng inclusive at community-based approaches.

Binigyang-diin din ng aktibidad ang mahigpit na kolaborasyon ng MSSD-MDS at Bangsamoro READi sa pagpapalakas ng disaster preparedness, pagpapabuti ng inter-agency coordination, at pagtataguyod ng resilient at disaster-ready communities sa buong Bangsamoro region.

Sa ilalim ng pamumuno ni Chief Minister Abdulraof Macacua, na kasalukuyan ring nagsisilbing Minister of the Interior and Local Government (MILG), binibigyang-halaga ang pakikipagtulungan ng iba’t ibang ministries, offices, agencies, organizations, at stakeholders bilang mahalagang susi sa epektibong disaster risk reduction at management.

Samantala, tiniyak ni Bangsamoro READi Head Muhammad “Bombet” Abutazil ang patuloy na commitment ng READi sa pagbibigay ng technical assistance sa lahat ng Disaster Risk Reduction and Management (DRRM) stakeholders, bilang bahagi ng pagsisikap na palakasin ang kahandaan at kaligtasan ng mga komunidad sa Bangsamoro.