Multilingual approach, iminumungkahi ng mga stakeholder ng Tawi-Tawi sa ginanap na konsultasyon hinggil sa isinusulong na panukalang batas para sa paggamit ng Arabic at English

iMINDSPH

Pinangunahan ng mga kinatawan mula sa iba’t ibang sektor ng Tawi-Tawi ang panawagan para sa mga signage na gumagamit ng wikang Arabic bilang bahagi ng pagkilala sa kultural na pamana ng Bangsamoro, ngunit nananatiling praktikal, nababasa, at inklusibo para sa lahat ng komunidad.

Sa ginanap na roundtable discussion hinggil sa proposed Signage Official Language Act, tumanggap ng malawak na suporta ang Bangsamoro Parliament Committee on Rules mula sa mga lokal na opisyal, guro, at negosyante sa lalawigan.

Ang panukalang batas ay naglalayong isabatas ang paggamit ng Arabic at English sa mga pampublikong karatula o signages sa buong rehiyon.

Ayon kay Committee Chair MP John Anthony “Jet” Lim, layunin ng panukala ni MP Suharto Esmael na palaganapin ang Arabic literacy at palakasin ang cultural identity ng Bangsamoro, habang sinisiguro na ang mga impormasyon ay madaling maunawaan ng lahat.

Ipinunto naman ni Board Member Dayang Carlsum Sangkula-Jumaide na mahalagang itaguyod ang Arabic, ngunit dapat din umanong may kalayaan ang bawat komunidad na pumili ng wikang angkop sa kanilang lugar.

Samantala, iminungkahi ni Provincial Planning and Development Coordinator Noor Mohammad Saada ang paggamit ng multilingual approach—kasama ang English, Filipino, Arabic, at mga lokal na diyalekto—upang maging mas inklusibo at representatibo ang mga signage sa buong rehiyon.

Magpapatuloy ang serye ng konsultasyon, kung saan tatalakayin naman ang dalawang iba pang panukalang batas—ang Bangsamoro People’s Initiative Act at Bangsamoro Public Petitions Act.