Panukalang batas na naglalayong tustusan ang gastusin ng mga mag-aaral lampas sa libreng matrikula, tulad ng pamasahe, libro, at pagkain, isinusulong sa BTA Parliament

 iMINDSPH

Itinutulak ni MP Baintan Ampatuan ang panukalang College Education Bridging Fund o CEBF.

Layon nitong tulungan ang mga estudyante mula sa low-income families na makapagpatuloy sa kolehiyo at matapos ang kanilang degree.

Sa ilalim ng panukala, ang CEBF ay magbibigay ng hindi bababa sa ₱50,000 kada estudyante upang matustusan ang gastusin lampas sa libreng matrikula, gaya ng pamasahe, dormitoryo, libro, internet, pagkain, at iba pang pangunahing pangangailangang pang-akademiko.

Pamamahalaan ang pondo ng Ministry of Basic, Higher, and Technical Education (MBHTE-BARMM), katuwang ang mga lokal na pamahalaan, kolehiyo, at iba pang partner institutions upang matiyak na ang tulong ay makarating sa mga tunay na nangangailangan.

Prayoridad ang mga mag-aaral mula sa mahihirap o conflict-affected areas, indigenous peoples (IPs), at persons with disabilities (PWDs).

Ayon kay Deputy Speaker Baintan Ampatuan, ang mga gastusing ito ang madalas na nagiging dahilan ng pagkaantala ng pag-aaral o tuluyang pag-dropout ng mga estudyante, kahit pa libre ang matrikula sa maraming institusyon.

Magpapalabas ang MBHTE ng guidelines sa eligibility, dokumentaryong kailangan, proseso ng pagpili, at paraan ng pag-release ng pondo.

Ayon sa mambabatas, kailangan ang pondo dahil 9.6% lamang ng mga nasa hustong gulang sa BARMM ang nakapagtapos ng kolehiyo—malayo sa national average na 24.9%. Maraming estudyante ang tumitigil sa pag-aaral dahil hindi kayang tustusan ang pang-araw-araw na gastusin kahit libre ang tuition.