10 wheelchair, ipinagkaloob ng Office of the Chief Minister sa pamamagitan ng Project TABANG sa Awang Airport para sa PWDs, senior citizens, at mga pasaherong may limitadong mobility

iMINDSPH

Ayon sa opisyal ng Project TABANG, ang mga wheelchair ay bahagi ng Serbisyong Ayudang Medikal (SAM) ng Health Ancillary Services, at magsisilbing tulong sa mga persons with disabilities (PWDs), senior citizens, at mga pasaherong may limitadong kakayahan sa paggalaw, partikular na ang mga Bangsamoro pilgrims na bumiyahe o nagbalik mula sa Hajj.

Nais ng tanggapan ni BARMM Interim Chief Minister na palawakin ang tulong at serbisyong ipinagkakaloob sa Bangsamoro.

Sinabi ni Project Manager Brahim Lacua, nananatiling nakatuon ang Project TABANG sa paghahatid ng direkta at tumutugong serbisyo sa komunidad.

Dumalo sa turnover ceremony sina Bangsamoro Airports Authority (BAA) Area Manager Carmencita Salik, Awang Airport Manager Johari Musa, at Honey Zenaida Baraguir, kasama ang mga opisyal ng Project TABANG na sina Information and Communications Head Hadji Harris Ismael, Health Ancillary Services Head Sittie Majadiyah Omar, at Ms. Abenhor Maguila, kinatawan ng Project Manager’s Office.

Binigyang-diin ng Project TABANG at Office of the Chief Minister na mananatiling prayoridad ang mabilis, organisado, at makataong pagtugon sa pangangailangan ng komunidad, lalo na sa mga Bangsamoro passengers at PWDs na nangangailangan ng karagdagang suporta sa airport facilities.