Basketball League 2026 sa Sultan Mastura na bahagi ng ika-23 anibersaryo ng bayan, sinimulan na

iMINDSPH

Pormal nang binuksan, araw ng Lunes, Enero 5, 2026, ang Basketball League 2026 ng Bayan ng Sultan Mastura, bilang bahagi ng pagdiriwang ng ika-23 Founding Anniversary ng bayan.

Pinangunahan ito ni Mayor Datu Armando Mastura Sr. Ayon sa alkalde, layunin ng palaro na isulong ang pagkakaisa, disiplina, at sportsmanship sa komunidad sa pamamagitan ng palakasan.

Inaasahan na magsisilbi itong makabuluhang plataporma para sa mga kabataang atleta at iba’t ibang koponan sa bayan.

Hinikayat ng pamahalaang bayan ang mga manlalaro, tagasuporta, at mamamayan na aktibong makiisa sa mga laro at magbigay-suporta sa kani-kanilang koponan.

Ayon sa mga tagapagtaguyod ng liga, higit pa sa kompetisyon ang layunin ng palaro—ito rin ay daluyan ng pagpapalakas ng pakikipagkapwa, teamwork, at positibong pagpapahalaga sa sports.

Bahagi ang Basketball League 2026 ng mga aktibidad na nagbibigay-diin sa aktibong pamumuhay at pagkakabuklod ng pamayanan, kasabay ng selebrasyon ng mahigit dalawang dekada ng paglilingkod at pag-unlad ng Bayan ng Sultan Mastura.