CFLGA AUDIT AT LCPC ASSESSMENT Pinaghahandaan na ng Maguindanao del Norte Provincial Government para sa Child-Friendly at Gender-Sensitive Governance

iMINDSPH

Pormal na isinagawa ng Provincial Government of Maguindanao del Norte ang CFLGA at LCPC Pre-Audit bilang bahagi ng patuloy nitong pagsisikap na mapanatili ang child-friendly, gender-sensitive, at protektibong pamantayan sa pamamahala.

Dinaluhan ang pagpupulong ng mga kinatawan, Technical Working Group (TWG) members, at secretariat mula sa iba’t ibang tanggapan kabilang ang GAD FPS, LCPC, LCAT-VAWC, PPDO, PYDO, Health Program, Nutrition Program, at Local School Board.

Pinangunahan ang aktibidad ni Bai Shajida Mastura, Chief of Staff at Coordinator for Special Programs, bilang kinatawan ni Provincial Governor Datu Tucao Mastura.

Layunin ng pre-audit na matiyak na kumpleto at maayos ang lahat ng kinakailangang sistema, mekanismo, at dokumentasyon bago ang nalalapit na assessment.

Kabilang sa mga pangunahing tinalakay ang pagpapalakas ng capacity development o CAPDEV initiatives para sa Local Council for the Protection of Children (LCPC), gayundin ang pagpapatibay ng koordinasyon at pagsunod sa mandato ng Local Committee on Anti-Trafficking and Violence Against Women and Children (LCAT-VAWC).

Sa pamamagitan ng isinagawang joint review, muling pinagtibay ng lalawigan ang kanilang pangako sa pangangalaga sa kapakanan ng mga bata, pagsusulong ng gender equality, at pagpapatatag ng mga responsibo at may pananagutang lokal na estruktura.

Binigyang-diin ng pamahalaang panlalawigan na patuloy nitong isusulong ang mga programa at polisiya na naglalayong lumikha ng ligtas, inklusibo, at makatarungang kapaligiran para sa bawat bata, kababaihan, at pamilya sa Maguindanao del Norte.