DOCUMENTARY VALIDATION Para sa agricultural interventions, isinagawa ng OPAG MagSur at Mindanao Inclusive Agriculture Development Project (MIADP) sa bayan ng Datu Saudi Ampatuan

iMINDSPH

Isinagawa noong Marso 3 ng Office of the Provincial Agriculturist (OPAG) ng Maguindanao del Sur ang isang documentary validation activity sa bayan ng Datu Saudi Ampatuan, katuwang ang Mindanao Inclusive Agriculture Development Project (MIADP).

Bumisita ang grupo kay Mayor Datu Bassir Banjo Dimaukom-Utto. Dumalo rin sa pagpupulong ang mga kinatawan ng Indigenous Peoples Organizations (IPOs), MIADP staff, at OPAG personnel.

Ang aktibidad ay isinagawa sa pakikipag-ugnayan sa Municipal Local Government Unit (MLGU) ng Datu Saudi Ampatuan, na nag-endorso ng apat na kooperatiba o asosasyon ng mga Indigenous Peoples (IP) para sa posibleng agricultural interventions.

Layunin ng documentary validation na suriin ang kasalukuyang kalagayan ng pagsasaka ng mga grupo, tukuyin ang mga pangunahing hamon sa crop management, at i-evaluate ang kanilang mga panukalang development plans.

Sa talakayan, ibinahagi ng mga farmer-groups ang ilang suliranin tulad ng pest at disease management, limitadong access sa de-kalidad na farm inputs, at kakulangan sa post-harvest handling. Ipinresenta rin nila ang kanilang mga farm plans na nakatuon sa pagpapabuti ng produksyon sa pamamagitan ng mas maayos na crop management practices at teknikal na suporta.