Dr. Hanifah Diacatra, kabilang sa 5 doctor na kinilala sa Most Outstanding Doctor to the Barrio (DTTB) Batch 40 “Mahiwaga

iMINDSPH

Pinarangalan si Dr. Hanifah Diacatra, isang Doctor to the Barrio (DTTB) na naka-deploy sa bayan ng Tugaya, Lanao del Sur bilang Most Outstanding DTTB Batch 40 “Mahiwaga”, isang prestihiyosong pagkilala na iginawad lamang sa limang natatanging doktor mula sa buong bansa.

Iginawad ang parangal sa ginanap na DTTB Batch 40 Exit Conference noong Enero 15, 2025 sa Naga City, bilang pagkilala sa pambihirang husay, dedikasyon, at malasakit ni Dr. Diacatra sa serbisyong pampubliko.

Ayon sa Department of Health, namukod-tangi si Dr. Diacatra sa kanyang matatag na pamumuno sa paghahatid ng mahahalagang serbisyong pangkalusugan, pagpapalakas ng primary health care system, at aktibong pakikipag-ugnayan sa mga lokal na pamahalaan at komunidad upang tugunan ang agarang pangangailangang pangkalusugan ng mamamayan.

Sa kabila ng mga hamon ng field deployment, ipinamalas ni Dr. Diacatra ang resilience at malasakit sa pag-abot sa mga liblib at underserved na komunidad—isang malinaw na larawan ng diwa at layunin ng DTTB Program.

Nagpaabot naman ng pagbati at pagkilala ang Department of Health, ang Ministry of Health – BARMM, at ang buong DTTB community sa makabuluhang ambag ni Dr. Diacatra sa pagpapabuti ng serbisyong pangkalusugan.

Ang kanyang tagumpay ay hindi lamang karangalan para sa BARMM at Lanao del Sur, kundi nagsisilbi ring inspirasyon sa mga health worker na patuloy na nagsusulong ng pantay, makatao, at abot-kayang serbisyong pangkalusugan para sa lahat ng Pilipino.