FIRE PROTECTION PROJECT Inilunsad sa Maguindanao del Sur Provincial Government ngayong 2026 Fire Prevention Month

iMINDSPH

Pinangunahan ng Office of the Provincial Planning and Development Coordinator – Maguindanao del Sur ang paglulunsad ng Fire Protection Project bilang hudyat ng pagsisimula ng pagdiriwang ng 2026 Fire Prevention Month. Ito ay pinamunuan ni Provincial Planning and Development Coordinator at Provincial POPS Coordinator na si Nulfarid Ampatuan.

Ginawa ang kickoff ceremony sa Provincial Capitol Grounds sa Buluan, kung saan nagtipon ang mga opisyal ng lalawigan, iba’t ibang ahensya, uniformed personnel, at mga miyembro ng komunidad.

Sa temang “Sa Pag-iwas sa Sunog, Hindi Ka Nag-iisa”, binigyang-diin sa programa na ang fire prevention ay hindi lamang responsibilidad ng iilang ahensya kundi ng buong komunidad. Layunin ng aktibidad na palakasin ang kamalayan, pagiging mapagmatyag, at maagap na pagkilos upang maprotektahan ang buhay at ari-arian ng mga mamamayan.

Kabilang sa mga dumalo ang Philippine National Police – Buluan Municipal Police Station, Bureau of Fire Protection – Maguindanao del Sur Provincial Office, at ang Barangay Peacekeeping Action Team (BPAT) ng Buluan—patunay ng mas pinalakas na koordinasyon ng mga ahensya pagdating sa public safety at emergency preparedness.

Sa kanilang mga mensahe, binigyang-diin ng mga opisyal ang kahalagahan ng kahandaan ng mga tanggapan at tuloy-tuloy na ugnayan ng iba’t ibang sektor upang maiwasan ang insidente ng sunog. Sa keynote address ni Provincial Fire Marshal CINSP Ronald Ali Ampang, muling pinagtibay ang pangako ng Bureau of Fire Protection na paigtingin ang kampanya sa fire prevention at palawakin ang pakikipagtulungan sa komunidad.

Bilang bahagi ng kickoff, nagsagawa rin ng motorcade na tampok ang mga fire truck, ambulansya, at rescue vehicles na umikot sa Buluan. Nagsilbi itong paalala sa publiko na seryoso ang lalawigan sa pagsusulong ng kaligtasan at kahandaan sa sakuna.

Para sa pamahalaang panlalawigan sa ilalim ng pamumuno ni Datu Ali Midtimbang, malinaw ang mensahe: ang pag-iwas sa sunog ay sama-samang responsibilidad. At sa Maguindanao del Sur, walang nag-iisa pagdating sa pagprotekta sa komunidad.