Hyundai Display at Service Center, itatayo sa Sultan Kudarat, Maguindanao del Norte

iMINDSPH

Masayang ibinahagi ni Sultan Kudarat Mayor Datu Shameem Mastura ang kanyang naging pulong sa pagitan ng mga kinatawan ng Hyundai kaugnay ng nalalapit na pagtatayo ng Hyundai Display Center at Service Center sa bayan ng Sultan Kudarat.

Ayon sa plano, itatayo ang pasilidad sa Datu Maguid Mocamad Building sa Barangay Bulalo, na magsisilbing Hyundai Showroom at Service Center. Layunin nitong maghatid ng mas malapit, maaasahan, at dekalidad na serbisyo para sa mga residente ng bayan at mga karatig-lugar.

Inaasahang magdudulot ang proyekto ng iba’t ibang benepisyo sa komunidad—kabilang ang paglikha ng mga bagong trabaho, pagpapalakas ng lokal na ekonomiya, at mas madaling access sa sasakyan at after-sales services. Isa rin itong patunay ng patuloy na pag-unlad ng bayan at ng lumalaking kumpiyansa ng pribadong sektor na mamuhunan sa Sultan Kudarat.

Sa pamumuno ni Mayor Mastura, patuloy ang pagsusumikap ng lokal na pamahalaan na maghatid ng mga proyektong magpapasigla sa kaunlaran ng bayan at magbubukas ng mas maraming oportunidad para sa mamamayan.