Kooperasyon sa pagitan ng OTS at MOTC BARMM, pinagtibay pa kasunod ng high-level coordination meeting

iMINDSPH

Isinagawa ang pagpupulong alinsunod sa direktiba ni Pangulong Ferdinand Bongbong Marcos Jr. na palakasin ang ugnayan ng pambansa at regional government upang matiyak ang ligtas, mabista, at maaasahang transportasyon bilang pundasyon ng kapayapaan, mobilidad, at inklusibong kaunlaran.

Pinangunahan ni OTS Administrator Undersecretary Gilberto Cruz ang pagpupulong na dinaluhan ng mga opisyal ng Ministry of Transportation and Communications – BARMM at ng mga attached agencies nito, na layong palalimin ang koordinasyon sa seguridad ng mga paliparan, pantalan, at land transportation systems sa buong Bangsamoro.

Kabilang sa mga dumalo sina Minister Termizie Masahud ng MOTC-BARMM, Deputy Minister Muhammad Abbas, Director General Atty. Roslaine Macao-Maniri, Atty. Ranibai Dilangalen ng Bangsamoro Airport Authority, Bai Amelia Abo ng Bangsamoro Ports Management Authority, Najmah Macapundag-Panolong ng Bangsamoro Maritime Industry Authority, at Commodore Rejard Marfe, District Commander ng Philippine Coast Guard – BARMM.

Sa pulong, nangako ang OTS na maglulunsad ng serye ng capacity-building activities para sa MOTC-BARMM at mga attached agencies nito, upang higit pang mapaigting ang kakayahan, kaalaman, at inter-agency coordination sa larangan ng transportation security.

Inihayag din na kasalukuyang binubuo ang isang Memorandum of Agreement o MOA upang pormal na maisaayos ang kooperasyon sa pagitan ng OTS at Bangsamoro authorities—na sasaklaw sa seguridad ng mga paliparan, pantalan, at land transport, at magpapatibay sa isang pinag-isang regional transportation security framework.

Ayon kay Undersecretary Cruz, mahalagang isabuhay ang mga ideyang napagkasunduan at ipagpatuloy ang kolaborasyon upang mas mapatatag ang seguridad sa lahat ng transport systems.

Matapos ang pagpupulong, personal ding binisita ni Undersecretary Cruz ang mga OTS Security Screening Officers upang kumustahin ang kanilang kalagayan at kondisyon sa trabaho—bilang pagpapakita ng suporta sa mga frontliners ng transportation security.