LTO, inanunsyo na ang E-driver’s license mula sa LTMS ay valid at pwede ipakita sa mga traffic enforcers at deputized agent tuwing may traffic violation o inspection

iMINDSPH

Sinabi ng LTO na maaaring ipakita ang digital na lisensya sa mga awtoridad tuwing may nakatakdang inspeksyon ng trapiko o kapag nahuli sa paglabag sa batas trapiko, at ito ay siyang pamalit sa pisikal na card.

Binigyang-diin ni LTO Chief Assistant Secretary Markus Lacanilao na ang mga law enforcer ng LTO at kanilang mga deputized agent ay kailangan na tanggapin ang e-driver’s license kung ang driver ay hihinto dahil sa paglabag sa batas trapiko o sasailalim sa nakatakdang inspeksyon at walang dalang pisikal na lisensya.

Dagdag ng LTO na maaaring ipakita ng driver ang e-driver’s license sa pamamagitan ng LTMS portal.

Mahalagang tandaan na ang tanging opisyal na digital na bersyon ng lisensya ng driver ay ang mga ma-access lamang sa sariling LTMS account ng driver. Hindi makikilala bilang wasto ng mga enforcer ng LTO ang ibang digital ID o screenshot o photocopy.

Ang e-driver’s license ay awtomatikong makukuha ng mga driver kapag nag-aaplay para sa bagong lisensya o nagre-renew ng kasalukuyang lisensya sa pamamagitan ng LTMS portal. Maaari itong ma-access sa pamamagitan ng LTMS platform o sa eGovPH digital services portal.