MEMORANDUM OF AGREEMENT Nilagdaan ng MOLE, DMW IX, OWWA, Tawi-Tawi Provincial Government at mga LGU na sakop nito para palakasin ang serbisyo sa OBWs sa lalawigan

iMINDSPH

Pormal na lumagda ang Ministry of Labor and Employment (MOLE) ng BARMM sa isang Memorandum of Agreement (MOA) kasama ang Department of Migrant Workers (DMW) Region IX, Overseas Workers Welfare Administration (OWWA), at Pamahalaang Panlalawigan ng Tawi-Tawi at mga munisipalidad nito noong Marso 30 upang palakasin ang serbisyo para sa Overseas Bangsamoro Workers (OBWs).

Layunin ng kasunduan na paigtingin ang mga programa at serbisyong ibinibigay sa mga OBWs at kanilang pamilya sa pamamagitan ng mas maayos na koordinasyon at paghahatid ng suporta. Agad itong ipatutupad at mananatiling epektibo sa loob ng tatlong taon.

Kinatawan ni BARMM Labor Minister Muslimin “Bapa Mus” Sema si MOLE Tawi-Tawi Supervising Labor and Employment Officer Haipa Jumdain, na muling nagpatibay ng pangako ng ahensya na tugunan ang pangangailangan ng mga OBWs.

Sa ilalim ng kasunduan, kabilang sa mga tungkulin ng MOLE ang pagsasagawa ng labor and employment education services, kampanya laban sa illegal recruitment at trafficking, at pakikipagtulungan sa mga lokal na pamahalaan sa pamamagitan ng Public Employment Service Office (PESO) para sa capacity building at technical assistance.

Nagkasundo rin ang mga lumagda na magpatupad ng mga programa para sa reintegration ng mga OFWs, pagtatatag ng OBW help desks, at pagpapatibay ng mga pre-employment, employment, at livelihood programs, kabilang ang pagsasagawa ng Pre-Employment Orientation Seminars (PEOS).

Ayon sa MOLE, ang kasunduan ay magpapalakas ng ugnayan ng mga institusyon upang mapangalagaan ang karapatan at kapakanan ng mga migranteng manggagawa sa Tawi-Tawi, kasabay ng patuloy na pagsulong ng maayos at responsableng serbisyo sa paggawa.