Mga CSO, kinilala sa 1st Civil Society Organization (CSO) Accreditation Awarding Ceremony na inorganisa ng Sangguniang Panlalawigan ng Maguindanao del Norte

iMINDSPH

Isang makasaysayang hakbang tungo sa mas inklusibo at matibay na pamamahala ang naisakatuparan matapos idaos ang 1st Civil Society Organization (CSO) Accreditation Awarding Ceremony sa Provincial Government Center Gymnasium sa Sultan Kudarat, Maguindanao del Norte.

Pinangunahan at pinangasiwaan ng Office of the Sangguniang Panlalawigan ang seremonya na layong hikayatin ang mga lokal na CSOs na higit pang paigtingin ang organizational management, financial accountability, at epektibong implementasyon ng mga programa para sa kapakinabangan ng mga komunidad.

Ayon sa mga opisyal, ang accreditation ay hindi lamang pagkilala, kundi isang hakbang para palakasin ang kakayahan ng CSOs bilang mahahalagang katuwang ng pamahalaang panlalawigan sa pagsusulong ng kaunlaran. Sa pamamagitan ng mas matibay na mga organisasyon, mas nagiging epektibo rin ang kanilang papel bilang development actors sa lalawigan.

Dinaluhan ang aktibidad ng mga Board Members ng Maguindanao del Norte, na muling nagpatibay sa matibay na paninindigan ng provincial government sa inclusive governance, pati na sa pagsusulong ng transparency at accountability sa lahat ng antas ng pamamahala.

Sa kabuuan, ang kauna-unahang CSO Accreditation Awarding Ceremony ay nagsisilbing patunay ng patuloy na pagtutulungan ng pamahalaan at civil society, na may iisang layunin ang gawing mas progresibo, mas matatag, at mas handa sa hamon ng panahon ang Maguindanao del Norte.