Mga programang prayoridad ngayong taon ng pamahalaang panlalawigan ng Maguindanao del Sur at mabisang paghahatid ng serbisyo, tinalakay sa unang executive meeting ng provincial government

iMINDSPH

Nanguna si Governor Datu Ali Midtimbang sa kauna-unahang executive meeting ngayong taon kung saan tinalakay ang pagtutugma ng mga prayoridad na programa, pagpapalakas ng koordinasyon sa pagitan ng mga tanggapan, at pagtitiyak ng mabisa at maayos na paghahatid ng mga serbisyo at proyekto sa buong lalawigan.

Layunin ng pamunuan na mas mapabilis ang implementasyon ng mga programa at maiwasan ang pagkakawatak-watak ng mga inisyatiba ng pamahalaan.

Sa pangunguna ni Datu Ali Midtimbang, binigyang-diin sa pulong ang people-centered governance na angkla sa adbokasiyang Serbisyong May Puso—isang paninindigang naglalayong maghatid ng makatao, maagap, at transparent na serbisyo publiko na tunay na nakikinig at tumutugon sa pangangailangan ng bawat Maguindanaon.

Ayon sa pamunuan, ang unang executive meeting ay nagsisilbing mahalagang hakbang upang mapagtibay ang kolektibong pananagutan ng mga opisyal at kawani ng pamahalaan sa pagpapatupad ng mga plano at polisiya. Inaasahan ding magsisilbi itong gabay sa mas malinaw na pagtutok sa mga sektor na nangangailangan ng agarang interbensyon.

Sa pagbubukas ng 2026, tiniyak ng Pamahalaang Panlalawigan ng Maguindanao del Sur ang patuloy na pagsusulong ng inklusibong kaunlaran, may pananagutang pamumuno, at mga konkretong hakbang na magbibigay ng positibong pagbabago at pangmatagalang benepisyo sa mga komunidad sa lalawigan.