P10K CASH ASSISTANCE Tinanggap ng 20 indigent college students sa Pata, Sulu mula sa ABaKa program ng MSSD

iMINDSPH

20 indigent college students mula sa bayan ng Pata ang tumanggap ng one-time educational cash assistance mula sa Ministry of Social Services and Development (MSSD) sa isinagawang Angat Bangsamoro: Kabataan Tungo sa Karunungan (ABaKa) Program payout noong Marso 4–5, 2026.

Sa ilalim ng programa, ayon sa MSSD BARMM, bawat mag-aaral ay tumanggap ng PHP 10,000 upang suportahan ang kanilang pag-aaral at matugunan ang kanilang pangunahing pangangailangan bilang mga estudyante sa kolehiyo.

Nagpatuloy ang payout ngayong araw, Marso 10, 2026 sa pamamagitan ng house-to-house distribution sa Barangay Saimbangon para sa mga estudyanteng hindi pa nakakatanggap ng tulong.

Ang ABaKa Program ay isa sa mga pangunahing inisyatiba ng MSSD na nakatuon sa pagbibigay ng suporta sa mga estudyanteng nagmula sa mahihirap na pamilya.

Layunin nitong tulungan ang mga mag-aaral na matugunan ang iba’t ibang gastusin na may kaugnayan sa kanilang pag-aaral, kabilang ang mga kagamitan para sa proyekto, pati na rin ang load at internet connection.