Pagpapalakas ng cultural identity at turismo sa Maguindanao del Sur, direksyon na tatahakin ng Provincial Tourism Office sa Maguindanao del Sur

iMINDSPH

Isagawa ng Provincial Tourism Office ng Maguindanao del Sur ang kauna-unahang pulong ng tanggapan ngayong taon, sa pamumuno ni Provincial Tourism Head Riselle Abo.

Layunin ng pamahalaang panlalawigan na tiyakin ang ganap na pagkakaayon ng buong tourism team sa vision ni Governor Datu Ali Midtimbang para sa mas masigla, inklusibo, at responsableng pagpapaunlad ng turismo sa lalawigan.

Tinukoy ng tanggapan ang mga target na output, tungkulin, at responsibilidad ng bawat miyembro ng tanggapan bilang paghahanda sa mga paparating na aktibidad ng lalawigan.

Partikular na binigyang-pansin ang Inaul Festival bilang isa sa mahahalagang plataporma sa pagpapalakas ng cultural identity at turismo ng Maguindanao del Sur, gayundin ang maingat at angkop na pagdidisenyo ng mga tourism initiative sa nalalapit na buwan ng Ramadhan, bilang paggalang sa kultura at paniniwala ng komunidad.

Ayon sa pamunuan ng PTO, ang malinaw na roadmap na nabuo sa pulong ay magsisilbing gabay sa pagpapatupad ng mas makabago at makabuluhang mga programa—mula sa promosyon ng pamanang kultura hanggang sa pagsusulong ng responsable at sustenableng turismo.

Sa kabuuan, ang unang pulong ng taon ng Provincial Tourism Office ay sumasalamin sa mas organisado at estratehikong paghahanda ng pamahalaang panlalawigan upang mapalakas ang imahe ng Maguindanao del Sur bilang isang umuusbong at mayamang destinasyon, habang tinitiyak na ang kaunlaran ng turismo ay kaakibat ng respeto sa kultura at kapakinabangan ng lokal na komunidad.