Pang-5 na districting bill, sumalang na sa unang pagbasa sa BTA Parliament

iMINDSPH

Isinusulong ni Member of Parliament Atty. Naguib Sinarimbo ang panukalang pagtatatag ng 32 single-member parliamentary districts.

Ito ang Parliament Bill No. 415.

Kasama ng mambabatas sa pagtutulak nito sa Bangsamoro Parliament sina MP Kitem Kadatuan Jr., Tomanda Antok, Alindatu Pagayao, Ibrahim Ibay, Butch Malang, Abdulbasit Benito, Maarouph Candao, Zaakaria Rakim, at Alirakim Munder.

Ang sampung mambabatas ay naitalaga sa Parliament noong buwan ng Marso nitong taon.

Apat na panukalang batas na hinggil sa districting ang naunang inihain sa BTA Parliament na ini-refer na sa Committees on Rules at Local Government para sa deliberasyon.

Sa ilalim ng panukala, apat ang parliamentary districts sa Basilan, siyam sa Lanao del Sur, lima sa Maguindanao del Norte, lima sa Maguindanao del Sur, apat sa Tawi-Tawi, dalawa sa Special Geographic Area, at tatlo sa Cotabato City.

Isasalang ito sa committee deliberation kasama ng apat pang inihaing proposals habang isinasapinal ng mga mambabatas ang allocation ng parliamentary seats bago ang 2026 elections.

Matatandaang humarap sa Committees on Rules at Local Government noong Nov. 14 ang Bangsamoro Attorney General upang pag-aralan muli ang legal implications ng ruling ng Supreme Court hinggil sa Bangsamoro Autonomy Act 77 (BAA 77), o ang Bangsamoro Redistricting Act of 2025, at ang motion for partial reconsideration.

Sinabi ni Bangsamoro Attorney General Bantuas Lucman na hinihiling ng Bangsamoro Government sa Supreme Court na paboran ang motion for partial reconsideration, pagtibayin ang constitutionality ng BAA 77, at bigyang-linaw na nananatili sa Kongreso ang exclusive power na magtakda ng election date at legislative deadlines para sa redistricting.