Project TABANG, pinangunahan ang turnover ng tulong at serbisyo ng Office of the Chief Minister

iMINDSPH

Isinagawa ang aktibidad bilang bahagi ng pagdiriwang ng 7th Bangsamoro Foundation Day

noong Huwebes, Enero 22, 2026, sa Shariff Kabunsuan Cultural Complex, Cotabato City.

Sa pamamagitan ng mga component units ng Project TABANG, naihatid ang mahahalagang tulong sa mga piling benepisyaryo sa iba’t ibang bahagi ng Bangsamoro.

Kabilang dito ang bigas at food packs sa ilalim ng Ayuda Alay sa Bangsamoro (ALAB) ng Humanitarian Response and Services; halo-halong buto ng gulay sa pamamagitan ng Oplan Bangsamoro Rapid Assistance (OBRA) ng Livelihood Component; at libreng gamot, wheelchair, walker, at tungkod sa ilalim ng Serbisyong Ayudang Medikal (SAM) ng Health Ancillary Services.

Ayon sa Project TABANG, Ipinapakita ng inisyatibang ito ang matibay na paninindigan ng Pamahalaang Bangsamoro sa people-centered governance—ang pagdadala ng agarang tulong at serbisyong kailangan ng komunidad sa pamamagitan ng koordinado, inklusibo, at tumutugong mga hakbang.

Sa ilalim ng pamumuno ni BARMM Interim Chief Minister Abdulraof Sammy Gambar Macacua, patuloy na itinataguyod ng Office of the Chief Minister ang layunin ng Project TABANG na iangat ang buhay ng mamamayan, palakasin ang kakayahan ng mga komunidad, at tiyaking walang naiiwan—lalo na ang mga pinaka-nangangailangang sektor—habang isinasalin sa kongkretong aksyon ang bisyon ng isang makatarungan, mahabagin, at nagsasariling Bangsamoro.