Tinanggap ng LGU Sultan Mastura ang parangal mula sa Synergeia Foundation, sa pakikipagtulungan ng DepEd, dahil sa patuloy na pagsusulong ng kalidad na edukasyon at inklusibong pag-unlad ng komunidad.

iMINDSPH

Personal na tinanggap ni Sultan Mastura Mayor Datu Armando Mastura Sr. ang parangal kasama si Engr. Mustapha Sinarimbo sa ginanap na Education Summit 2026 ng Synergeia at DepEd.

Ginanap ang awarding ceremony noong Pebrero 19, 2026 sa Philippine International Convention Center sa Maynila.

Ang pagkilalang iginawad ng Synergeia Foundation sa pakikipagtulungan ng Department of Education ay sumasalamin sa matibay na paninindigan ng pamahalaang bayan sa pagbibigay ng responsibong serbisyo publiko at pagpapatupad ng mga programang nakatuon sa kapakanan ng mamamayan.

Sa naturang pagtitipon, kinilala ang Sultan Mastura LGU sa mga patuloy nitong inisyatiba at programang naglalayong mapabuti ang kalidad ng buhay ng mga residente, partikular sa larangan ng edukasyon. Binigyang-diin din ang mahalagang suporta ng alkalde na nagbigay-daan upang aktibong makibahagi ang bayan sa makabuluhang pagtitipon ng mga education stakeholders mula sa iba’t ibang panig ng bansa.

Ayon sa pamahalaang bayan, ang parangal ay patunay na ang sama-samang pagkilos ng lokal na pamahalaan at sektor ng edukasyon ay may konkretong bunga—mas matatag na pundasyon para sa kinabukasan ng kabataan at komunidad ng Sultan Mastura.