TOBACCO FARMERS REGISTRATION Isinagawa ng OPAG Maguindanao del Sur sa lalawigan sa tulong ng National Tobacco Administration

iMINDSPH

Nagsagawa ng registration ng mga tobacco farmer ang Office of the Provincial Agriculturist (OPAG) – Maguindanao del Sur sa pakikipagtulungan ng National Tobacco Administration (NTA) at ng Municipal Local Government Unit (MLGU) ng Datu Paglas.

Bahagi ang aktibidad ng mandatory tobacco farmers registration program ng pamahalaan na naglalayong maayos na maregula ang produksyon ng tabako at makabuo ng updated at beripikadong database ng mga lehitimong magsasaka ng tabako sa lalawigan.

Sa pamamagitan ng pagpapatala, maisasagawa ang opisyal na profiling at dokumentasyon ng mga tobacco farmer, na magsisilbing daan upang makakuha sila ng mga programa ng pamahalaan, teknikal na tulong, production support, at iba pang benepisyo mula sa NTA at iba pang kaugnay na ahensya.

Ayon sa mga opisyal, magsisilbi ring batayan ang makakalap na datos sa pagbuo ng mga polisiya, paglalaan ng pondo, monitoring, at pagpapatupad ng mga programang may kaugnayan sa industriya ng tabako sa lalawigan.

Naitala rin ang aktibong partisipasyon ng mga tobacco farmer mula sa iba’t ibang bayan, na nagpapakita ng kanilang pagsunod sa mga regulasyon at suporta sa mga inisyatiba ng pamahalaan para palakasin ang pamamahala sa sektor ng tabako.

Patuloy ang koordinasyon ng OPAG Maguindanao del Sur at NTA sa pagpapatupad ng mga programang naglalayong isulong ang sustainable production, pagsunod sa mga regulasyon, at pagpapabuti ng kabuhayan ng mga tobacco farmer sa lalawigan.